រដ្ឋមន្ត្រីក្រសួងមហាផ្ទៃ លោក ស ខេង បានជំរុញអាជ្ញាធរឱ្យត្រួតពិនិត្យ និងផ្សព្វផ្សាយអប់រំដល់យុវជនអំពីការជួញដូរ និងប្រើប្រាស់គ្រឿងញៀន។ នេះជាការថ្លែងសាររបស់លោកនៅក្នុងពិធីបុណ្យបញ្ចុះខណ្ឌសីមាព្រះវិហារ និងសមិទ្ធផលនានា នៅវត្តមេលប់ ស្ថិតនៅភូមិមេលប់ ឃុំរកា ស្រុកពារាំង ខេត្តព្រៃវែង កាលថ្ងៃទី ១៤ ខែមីនា ឆ្នាំ ២០២៣។
លោក ស ខេង បានជំរុញឱ្យសមត្ថកិច្ចពាក់ព័ន្ធទាំងអស់ ត្រូវអនុវត្តច្បាប់ដោយម៉ឺងម៉ាត់ និងស្មោះត្រង់វិជ្ជាជីវៈរបស់ខ្លួន ដើម្បីឱ្យការអនុវត្តច្បាប់មានប្រសិទ្ធភាពខ្ពស់ ដោយបញ្ជាក់ថា កុំពាក់ព័ន្ធគឺ កុំជួញដូរ កុំចែកចាយ កុំធ្វើខ្នងបង្អែក កុំឃុបឃិត និងកុំប្រើប្រាស់គ្រឿងញៀន កុំអន្តរាគមន៍រារាំងការអនុវត្តច្បាប់ចំពោះឧក្រិដ្ឋជនគ្រឿងញៀន ទោះបីជាក្រុមគ្រួសារ សាច់ញាតិ ឬមិត្តភក្តិក៏ដោយ កុំលើកលែងគឺ កុំបន្ធូរបន្ថយការអនុវត្តច្បាប់ចំពោះឧក្រិដ្ឋជនគ្រឿងញៀន។
ក្រៅពីនេះ លោកក៏បានថ្លែងដោយស្នើដល់ប្រជាពលរដ្ឋទាំងអស់ចូលរួមប្រយុទ្ធប្រឆាំងនឹងអំពើជួញដូរមនុស្សគ្រប់ទម្រង់ ដើម្បីលើកស្ទួយសិទ្ធិមនុស្ស ដោយសហការយ៉ាងមានប្រសិទ្ធភាពជាមួយកម្លាំងសមត្ថកិច្ចពាក់ព័ន្ធ ដើម្បីបង្ក្រាប និងទប់ស្កាត់ពីការជួញដូរ និងប្រើប្រាស់គ្រឿងញៀន ព្រមទាំងបានទាន់ពេលវេលា។
លោកថ្លែងថា អាជ្ញាធរមានសមត្ថកិច្ច កងកម្លាំងប្រដាប់អាវុធ និងប្រជាពលរដ្ឋទាំងអស់ ត្រូវរួមគ្នាការពារសន្តិភាព ស្ថិរភាពនយោបាយ សណ្តាប់ធ្នាប់សង្គម ចូលរួមអនុវត្តគោលនយោបាយ ភូមិ ឃុំ មានសុវត្ថិភាព និងអនុវត្តច្បាប់ចរាចរណ៍ផ្លូវគោកឱ្យបានខ្ជាប់ខ្ចួន កុំឱ្យមានគ្រោះថ្នាក់ចរាចរណ៍។
លោក ស ខេង អះអាងថា ការជំរុញត្រូវដល់អាជ្ញាធរនេះ គឺដើម្បីចូលរួមរក្សាសន្តិសុខ សណ្តាប់ធ្នាប់ សន្តិភាព ស្ថិរភាពនយោបាយ លទ្ធិប្រជាធិបតេយ្យ ជំរុញដំណើរង្គម សេដ្ឋកិច្ចកម្ពុជាឱ្យកាន់តែរឹងមាំថែមទៀត។
បើតាមរបាយការណ៍ពីអាជ្ញាធរជាតិ ប្រយុទ្ធប្រឆាំងគ្រឿងញៀន ដែលចេញផ្សាយកាលពីថ្ងៃទី ៦ ខែមករា ឆ្នាំ ២០២៣ បានបង្ហាញថា ពេញ ១ ឆ្នាំ ២០២២ កម្លាំងសមត្ថកិច្ចបានបង្ក្រាបបទល្មើសគ្រឿងញៀន (នគរបាល និងអាវុធហត្ថ) សរុបចំនួន ៦ ២៩០ ករណី ដោយឃាត់ខ្លួនមនុស្សចំនួន ១៤ ៧៨៤ នាក់ ក្នុងនោះមានជនបរទេស ២៥៩ នាក់ មាន ៩ សញ្ជាតិ។
លោក អំ សំអាត នាយកទទួលបន្ទុកកិច្ចការទូទៅនៃអង្គការលីកាដូ បានថ្លែងដោយសម្តែងក្តីបារម្ភខ្លាំងជុំវិញបញ្ហានេះ ដែលកំពុងតែធ្វើឱ្យយុវជនកម្ពុជា ទាំងនៅទីក្រុង និងជនបទកំពុងទទួលរងឥទ្ធិពលនៃគ្រឿងស្រវឹង និងគ្រឿងញៀនដែលជាគ្រឿងបំផ្លាញអនាគតរបស់ពួកគេ បើសិនមិនមានការទប់ស្កាត់បានទាន់ពេលវេលាទេនោះ។
លោកថ្លែងថា៖ «បញ្ហានេះគឺទាមទារឱ្យពង្រឹងនូវការអនុវត្តច្បាប់របស់សមត្ថកិច្ច ជាពិសេសការអនុវត្តគោលនយោបាយ ភូមិ-ឃុំ-សង្កាត់ មានសុវត្ថិភាពឱ្យកាន់តែល្អ និងមានប្រសិទ្ធភាពថែមទៀត ព្រោះបច្ចុប្បន្នមានបទល្មើសការជួញដូរ និងប្រើប្រាស់គ្រឿងញៀនកាន់តែច្រើន (ដែលត្រូវ) ចូលរួមកាត់បន្ថយបញ្ហាគ្រឿងញៀនក្នុងចំណោមយុវជន ក៏ដូចជាពលរដ្ឋ៕
