តាកែវៈ រដ្ឋមន្ដ្រីកសិកម្ម លោក ឌិត ទីណា បានបង្ហាញនូវការគាំទ្រ លើកទឹកចិត្ត និងត្រៀមខ្លួនក្នុងការជំរុញឱ្យកសិដ្ឋានចិញ្ចឹមគោយកទឹកដោះគិរីសួគ៌របស់ក្រុមហ៊ុន ខ្មែរ ហ្វ្រេស មីល កាន់តែរីកលូតលាស់បន្ថែមទៀត ដើម្បីផ្គត់ផ្គង់តម្រូវការទឹកដោះគោស្រស់ក្នុងស្រុក បន្ទាប់ពីលោកបានធ្វើទស្សនកិច្ចនៅកសិដ្ឋាននេះ នាថ្ងៃទី២៤ ខែកុម្ភៈនេះ។
គេហទំព័រក្រសួងកសិកម្មបញ្ជាក់នាថ្ងៃទី២៤ ខែកុម្ភៈ ថា៖ «បន្ទាប់ពីបានធ្វើទស្សនកិច្ចពិនិត្យ និងសិក្សាស្វែងយល់ពីដំណើរការនិងស្ថានភាពនៃកសិដ្ឋានចិញ្ចឹមគោយកទឹកដោះរួចមក ឯកឧត្តមរដ្ឋមន្ត្រី បានបង្ហាញនូវការគាំទ្រ លើកទឹកចិត្ត និងត្រៀមខ្លួនជំរុញឱ្យកសិដ្ឋានកាន់តែរីកលូតលាស់បន្ថែមទៀត ដើម្បីផ្គត់ផ្គង់តម្រូវការទឹកដោះគោស្រស់ក្នុងស្រុក ដែលជាអាហារូបត្ថម្ភដ៏ល្អសម្រាប់ការលូតលាស់ទាំងផ្នែករាងកាយ និងប្រាជ្ញាស្មារតី ជាពិសេសកុមារ»។
លោក ឌិត ទីណា បានផ្ដល់អនុសាសន៍ដល់កសិដ្ឋាននេះ អំពីការធ្វើពិពិធកម្មដំណើរការផលិតរបស់ខ្លួន ដើម្បីផ្តល់ផលប្រយោជន៍ដល់ប្រជាពលរដ្ឋនៅតំបន់ជុំវិញ ដោយកសិដ្ឋានគួរពិនិត្យលទ្ធភាពក្នុងការពង្រីកផ្ទៃដីស្មៅសម្រាប់ផ្គត់ផ្គង់ចំណីគោ តាមរយៈការចុះកិច្ចសន្យាជាមួយប្រជាពលរដ្ឋដែលមានដីធំ។
លោកលើកឡើងថា ក្រសួងកសិកម្ម និងរូបលោកផ្ទាល់ នឹងជួយធ្វើយ៉ាងណាឱ្យប្រជាពលរដ្ឋមានទំនុកចិត្តលើកសិដ្ឋាននេះដើម្បីឱ្យភាគីទាំង២អាចសហការគ្នាឈានទៅបំពេញតម្រូវការនៃខ្សែច្រវាក់ផលិតកម្ម ហើយបន្ថែមថា ឱកាសផ្តល់ជូនដោយស្មើភាពគ្នា ហើយអ្នកដែលចាប់យកឱកាសបានមុនគេ នឹងទទួលបានផលចំណេញមុនគេដែរ៕
