ភ្នំពេញៈ លោកនាយករដ្ឋមន្ត្រី ហ៊ុន ម៉ាណែត បានអំពាវនាវឱ្យវិនិយោគិនអាមេរិក មកស្វែងរកឱកាសវិនិយោគនៅប្រទេសកម្ពុជា ព្រោះការវិនិយោគផ្ទាល់ពីអាមេរិកនៅមានកម្រិតតិចតួចបំផុតបើធៀបទៅប្រទេសមួយចំនួនទៀត។
ការអំពាវនាវរបស់លោកនាយករដ្ឋមន្ដ្រីត្រូវបានធ្វើឡើងនៅក្នុងវេទិកាធុរកិច្ចអាមេរិកកម្ពុជា «កាលានុវត្តភាពថ្មី វិបុលភាពរួម» នៅទីក្រុងញូវយ៉ក សហរដ្ឋអាមេរិក កាលពីថ្ងៃទី ២២ ខែកញ្ញា ឆ្នាំ ២០២៣។ ព្រឹត្តិការណ៍នេះត្រូវបានសហការរៀបចំឡើងដោយសភាពាណិជ្ជកម្មកម្ពុជា (CCC) ជាមួយសភាពាណិជ្ជកម្មអាមេរិក។
លោកថ្លែងថា អាមេរិក និងកម្ពុជាមានប្រវត្តិមិត្តភាព និងកិច្ចសហប្រតិបត្តិការដ៏យូរអង្វែង គឺតាំងពីឆ្នាំ ១៩៥០ ខណៈទំនាក់ទំនងពាណិជ្ជកម្មទ្វេភាគីមានទឹកប្រាក់ ១៣,៥ ពាន់លានដុល្លារក្នុងឆ្នាំ ២០២២។ អាមេរិកនៅតែបន្តជាទីផ្សារនាំចេញដ៏ធំបំផុតរបស់កម្ពុជា ជាពិសេសសម្រាប់ផលិតផលិតផលសម្លៀកបំពាក់ ស្បែកជើង និងកាបូប។
លោកបានបន្តទៀតថា ទាក់ទងនឹងទំនាក់ទំនងវិនិយោគ គឺការវិនិយោគផ្ទាល់ពីបរទេស (FDI) របស់អាមេរិកនៅប្រទេសកម្ពុជា មានចំនួនតិចតួច ទោះបីអាមេរិកជាវិនិយោគិនអន្តរជាតិធំជាងគេក៏ដោយ។ អត្រាភាគរយនៃ FDI របស់កម្ពុជាពីអាមេរិកបានកើនឡើងពី ២២៥ លានដុល្លារ កាលពីឆ្នាំ ២០១០ ដល់ ៨៩៣ លានដុល្លារ ក្នុងឆ្នាំ ២០២២។
ថ្មីៗនេះក្រុមហ៊ុនចម្រុះជាតិសាសន៍អាមេរិកដែលមកវិនិយោគនៅកម្ពុជា មានដូចជាក្រុមហ៊ុន Ford, Coca-Cola, Tiffany និង General Electric ដោយសារទំហំទីផ្សារកាន់តែធំរបស់កម្ពុជា និងកំណើនប្រាក់ចំណូលរបស់ប្រជាជនកម្ពុជា។
លោកថ្លែងថា៖ «តាមចក្ខុវិស័យរបស់វិនិយោគិនបរទេស ប្រទេសមួយដែលមានស្ថិរភាពនយោបាយ និងកំណើនសេដ្ឋកិច្ច គឺជាគោលដៅដែលគេចង់បាន។ ជាមួយនឹងគោលបំណងក្លាយជាប្រទេសមានប្រាក់ចំណូលខ្ពស់ត្រឹមឆ្នាំ ២០៥០ រាជរដ្ឋាភិបាលកម្ពុជាបានដាក់ចេញយុទ្ធសាស្ត្របញ្ចកោណ ដែលជារបៀបវារៈនៃការអភិវឌ្ឍសេដ្ឋកិច្ច-សង្គមរបស់កម្ពុជាក្នុងរយៈពេល ២៥ ឆ្នាំខាងមុខ»។
លោកបន្ថែមថា យុទ្ធសាស្ត្រនេះដាក់ចេញជាអាទិភាពសំខាន់ៗចំនួន ៥ គឺ ប្រជាជន ផ្លូវថ្នល់ ទឹក អគ្គិសនី និងបច្ចេកវិទ្យា ដោយផ្តោតជាពិសេសលើការអភិវឌ្ឍធនធានមនុស្ស និងបច្ចេកវិទ្យាឌីជីថល ដើម្បីឆ្លើយតបទៅនឹងបដិវត្តន៍ឧស្សាហកម្មទី៤ និងបដិវត្តន៍ឌីជីថលសម្រាប់ការអភិវឌ្ឍសេដ្ឋកិច្ចសង្គមរបស់ខ្លួន។
អនុប្រធានសភាពាណិជ្ជកម្មកម្ពុជា លោក គួច ផេង បានឱ្យដឹងក្នុងវេទិកានេះថា គោលបំណងសំខាន់នៃវេទិកាធុរកិច្ច គឺដើម្បីលើកកម្ពស់ទំនាក់ទំនងពាណិជ្ជកម្ម ការវិនិយោគ និងសេដ្ឋកិច្ចរវាងអាមេរិក និងកម្ពុជា។
លោកនិយាយថា៖ «អាមេរិក គឺជាទីផ្សារនាំចេញឈានមុខគេរបស់កម្ពុជា និងជាប្រភពនៃការវិនិយោគបរទេសដ៏សំខាន់។ ដោយប្រកាន់យកយុទ្ធសាស្ត្របញ្ចកោណរបស់កម្ពុជា និងចក្ខុវិស័យកម្ពុជា ដើម្បីក្លាយជាប្រទេសមានប្រាក់ចំណូលមធ្យមកម្រិតខ្ពស់ត្រឹមឆ្នាំ ២០៣០ និងជាប្រទេសមានប្រាក់ចំណូលខ្ពស់ត្រឹមឆ្នាំ ២០៥០ មានឱកាសច្រើនសម្រាប់វិនិយោគិន»។
លោក ហ៊ុន ម៉ាណែត ក៏បានបញ្ជាក់ផងដែរថា សេដ្ឋកិច្ចពិភពលោកមានភាពប្រទាក់ក្រឡាគ្នាល្អ និងពឹងផ្អែកគ្នាកាន់តែខ្លាំងឡើងៗ ខណៈកម្ពុជាបន្តពង្រីកទំហំទីផ្សារតាមរយៈការធ្វើសមាហរណកម្មទៅក្នុងខ្សែចង្វាក់ផ្គត់ផ្គង់ និងតម្លៃពិភពលោក និងតាមរយៈកិច្ចព្រមព្រៀងពាណិជ្ជកម្មសេរីដូចជា កិច្ចព្រមព្រៀងពាណិជ្ជកម្មសេរីអាស៊ាន កិច្ចព្រមព្រៀងពាណិជ្ជកម្មសេរីកម្ពុជា-ចិន កិច្ចព្រមព្រៀងពាណិជ្ជកម្មសេរីកម្ពុជា-កូរ៉េ និងកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) ដែលបម្រើជាច្រកផ្លូវនាំចេញសម្រាប់ទំនិញផលិតដោយក្រុមហ៊ុនចម្រុះជាតិសាសន៍របស់អាមេរិកនៅកម្ពុជាទៅទីផ្សារធំៗ។
លោកនិយាយថា៖ «ខ្ញុំពិតជាមានសេចក្តីសោមនស្សរីករាយក្នុងការ-អញ្ជើញវិនិយោគិន និងពាណិជ្ជករអាមេរិកមកទស្សនាប្រទេសកម្ពុជា និងស្វែងយល់បន្ថែមអំពីសក្តានុពល និងឱកាសសេដ្ឋកិច្ច និងការវិនិយោគនៅកម្ពុជា។ រដ្ឋាភិបាលបន្តផ្តល់ការគាំទ្រដោយឥតងាករេសម្រាប់ឱកាសដើម្បីបង្កើតអាជីវកម្ម ប្រតិបត្តិការអាជីវកម្ម ការពង្រីកអាជីវកម្ម និងការវិនិយោគក្នុងប្រទេស ក៏ដូចជាការដោះស្រាយបញ្ហាប្រឈមនានា ទាំងផ្នែកដែលនៅសេសសល់ និងដែលកំពុងកើតឡើង ដើម្បីពន្លឿនការអភិវឌ្ឍពេញលេញនៃវិស័យឯកជន»៕
