ភ្នំពេញៈ លោកនាយករដ្ឋមន្រ្តី ហ៊ុន ម៉ាណែត បានប្រកាសដាក់ឱ្យអនុវត្តកម្មវិធីរបបសន្តិសុខសង្គម និងការបណ្តុះបណ្តាលវិជ្ជាជីវៈបច្ចេកទេសដោយលោកថា នេះគឺជាព្រឹត្តិការណ៍ប្រវត្តិសាស្ត្រមួយទៀតរបស់កម្ពុជា ខណៈលោកបានអំពាវនាវឱ្យសិក្ខាកាមទាំងអស់ដាក់ចិត្ត ក្នុងការរៀនសូត្រ ដើម្បីបានគុណភាព និងជំនាញពិតប្រាកដ។
លោក ហ៊ុន ម៉ាណែត កាលពីថ្ងៃទី១៤ ខែវិច្ឆិកា ឆ្នាំ២០២៣ បានប្រកាសដាក់ឱ្យអនុវត្តជាផ្លូវការ «របបសន្តិសុខសង្គមផ្នែកថែទាំសុខភាពតាមរបបភាគទានដោយស្ម័គ្រចិត្ត សម្រាប់បុគ្គលស្វ័យនិយោជន៍ និងអ្នកក្នុងបន្ទុកសមាជិក ប.ស.ស» និង «កម្មវិធីបណ្តុះបណ្ដាលជំនាញវិជ្ជាជីវៈ និងបច្ចេកទេសដល់យុវជនមកពីគ្រួសារក្រីក្រ និងគ្រួសារងាយរងហានិភ័យ»។
លោកបានមានប្រសាសន៍ក្នុងពិធីប្រកាសនេះថា៖ «ថ្ងៃនេះអាចចាត់ទុកជាថ្ងៃប្រវត្តិសាស្រ្តមួយ សម្រាប់ការអភិវឌ្ឍប្រព័ន្ធសន្តិសុខសង្គម និងការបណ្តុះបណ្តាលបច្ចេកទេស វិជ្ជាជីវៈនៅកម្ពុជា។ នៅពេលដែលយើងនិយាយពីមូលធនមនុស្ស គឺយើងត្រូវយកចិត្តទុកដាក់ទៅលើកត្តា២ គឺសុខភាព និងសមត្ថភាព ហើយកម្មវិធី២ដែលយើងប្រកាសនាពេលនេះគឺផ្តោតទៅលើមូលធនមនុស្សនេះ»។
លោក ហ៊ុន ម៉ាណែត ក៏បានលើកឡើងដែរថា កម្មវិធីដែលលោកបានប្រកាសដាក់ឱ្យអនុវត្តនាពេលនេះ មានវិសាលភាពអនុវត្តន៍ចំពោះអ្នកទទួលផលគ្របដណ្តប់ប្រជាជនសរុបប្រមាណជាង ៥លាននាក់។
លោកថា បើបូកគិតរួមទាំងរបបថែទាំសុខភាពតាមមូលនិធិសមធម៌សុខាភិបាល ជូនគ្រួសារងាយរងហានិភ័យ ដែលលោកបានប្រកាសដាក់ឱ្យដំណើរការកាលពីថ្ងៃទី២៤ តុលា កន្លងទៅ ដែលគ្របដណ្តប់ប្រជាជនប្រមាណជាង ៤ លាននាក់នោះ កម្មវិធីថែទាំសុខភាពរបស់រាជរដ្ឋាភិបាល នឹងផ្ដល់អត្ថប្រយោជន៍ជូនប្រជាជនប្រមាណជាង ៩ លាននាក់។
គោលដៅរបស់រាជរដ្ឋាភិបាលគ្រប់ជំនាន់ គឺថាធ្វើយ៉ាងណាឱ្យប្រជាពលរដ្ឋខ្មែរពី ១ ជំនាន់ ទៅ ១ ជំនាន់កាន់តែល្អប្រសើរ កាន់តែមានឱកាស កាន់តែរឹងមាំ និងកាន់តែឈ្លាសវៃ និងសមត្ថភាពកាន់តែខ្ពស់ ដើម្បីជំរុញប្រទេសជាតិឱ្យរីកចម្រើនកាន់តែលឿន។
លោក ហ៊ុន ម៉ាណែត ថ្លែងថា ៖ «រាជរដ្ឋាភិបាលបានយកចិត្តទុកដាក់ទៅលើសុខុមាលភាពរបស់ប្រជាពលរដ្ឋតាំងពីមុនពេលកើត រហូតដល់ពេលកើត។ រាជរដ្ឋាភិបាលគ្រប់ជំនាន់ គឺមានការគិតគូរខ្ពស់ចំពោះការលើកកម្ពស់សុខុមាលភាព និងសមត្ថភាពរបស់ប្រជាពលរដ្ឋ»។
តាមការសិក្សាកន្លងមកកម្មករនិយោជិត ឬប្រជាពលរដ្ឋម្នាក់ជាមធ្យម ត្រូវចំណាយ ២៥០ដុល្លារ ក្នុង ១ឆ្នាំ ឬចន្លោះពី ១៥ដុល្លារ ទៅ២០ដុល្លារ ក្នុង ១ខែ ក្នុងករណី ដែលមិនមានរបបថែទាំសុខភាពនេះជាហេតុធ្វើឱ្យពួកគេមួយចំនួនធំ មិនសូវហ៊ានទៅពិគ្រោះយោបល់ជាមួយគ្រូពេទ្យញឹកញាប់ ដោយសារនេះ ជាការចំណាយផ្ទាល់ខ្លួន រហូតបណ្ដាលឱ្យខ្លួនឈឺដល់ដំណាក់-កាលធ្ងន់ធ្ងរ ពិបាកជួយទាន់ពេលវេលា។ នេះបើតាមលោកនាយករដ្ឋមន្រ្តី។
លោកបានបន្តថា ៖ «បច្ចុប្បន្ន ប.ស.សបានក្លាយជានិមិត្តរូប និងការរីកចម្រើនរបស់ប្រជាជន និងបងប្អូនកម្មករនិយោជិតរបស់យើងដោយបានកាត់បន្ថយការចំណាយ ពង្រឹងស្ថិរភាព និងការព្យាករនៃចំណូល រួមនឹងការធ្វើឱ្យប្រសើរឡើងនូវសុខភាពរបស់ខ្លួនផងដែរ»។
នាឱកាសនោះដែរ លោកនាយករដ្ឋមន្រ្តី ក៏បានជំរុញ និងលើកទឹកចិត្តឱ្យមានការចូលរួមពីគ្រួសារ និងយុវជនដោយផ្ទាល់ផងដែរ ដោយលោកបានអំពាវនាវថា ៖ «សូមក្មួយៗប្អូនៗយុវជនដែលត្រូវទទួលបានការបណ្តុះបណ្តាលនេះ សុំដាក់ចិត្ត និងត្រូវគិតថាជំនាញអ្វីក៏ល្អដែរ ឱ្យតែយើងចេះប្រាកដហើយរាជរដ្ឋាភិបាលគ្រាន់តែជាអាណាព្យាបាលដែលអាចជួយបណ្តុះបណ្តាលឱ្យរឹងដៃរឹងជើង និងផ្តល់ឱកាសពេលចាំបាច់ប៉ុណ្ណោះ»។
លោកថា ការបណ្ដុះបណ្ដាលជំនាញវិជ្ជាជីវៈ និងបច្ចេកទេសដល់យុវជនដល់គ្រួសារក្រីក្រ និងងាយរងហានិភ័យ នេះមានតួនាទីចម្បង៣ រួមមាន៖១ ផ្តល់ការបណ្តុះបណ្តាលជំនាញ វិជ្ជាជីវៈ និងបច្ចេកទេសដល់យុវជនមកពីគ្រួសារក្រីក្រ និងគ្រួសារងាយរងហានិភ័យ, ២ ជួយកាត់បន្ថយគម្លាតជំនាញ និងលើកកម្ពស់ផលិតភាពនៅក្នុងសកម្មភាពផលិតកម្ម និងអាជីវកម្ម និង៣ ជំរុញកំណើនសេដ្ឋកិច្ចខ្ពស់តាមការផ្តល់កម្លាំងពលកម្មជំនាញ។
លោក ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ ក៏បានលើកឡើងដែរថា ការពង្រីកវិសាលភាពរបបសន្តិសុខសង្គមផ្នែកថែទាំសុខភាព ដល់បុគ្គលស្វ័យនិយោជន៍ និងអ្នកក្នុងបន្ទុកសមាជិក ប.ស.ស តាមគោលការណ៍ស្ម័គ្រចិត្តនាពេលនេះគឺជាប្រវត្តិសាស្រ្តថ្មីមួយបន្ថែមសម្រាប់កម្ពុជា។
លោកថ្លែងថា ៖ «ពិធីថ្ងៃនេះ គឺជាវឌ្ឍនភាពវិជ្ជមានចំនួន២ថែមទៀត លើការងារអាទិភាពចំនួន៦ ក្នុងឆ្នាំ២០២៣ ដែលសម្តេចធិបតី បានណែនាំកាលពីថ្ងៃទី២៩ ខែសីហា សំដៅបង្កើនប្រាក់ចំណូល ការធានាលក្ខខណ្ឌការងារល្អប្រសើរ ការពង្រឹងសុខដុមនីយកម្មទំនាក់ទំនងវិជ្ជាជីវ: កិច្ចគាំពារសង្គម និងជំនាញវិជ្ជាជីវៈជូនបងប្អូនកម្មករនិយោជិត និងក្រុមគ្រួសារ»។
យោងតាមរបាយការណ៍របស់ក្រសួងការងារ បុគ្គលស្វ័យនិយោជន៍ និងអ្នកក្នុងបន្ទុកសមាជិក ប.ស.ស រួមមាន ប្តីឬប្រពន្ធ និងកូនក្នុងបន្ទុក អាចទទួលបានរបបសន្តិសុខសង្គម ផ្នែកថែទាំសុខភាព ដោយគ្រាន់តែបង់ភាគទានត្រឹមតែ ១៥ ៦០០ រៀល គឺអាចទទួលបានសេវាព្យាបាល និងថែទាំវេជ្ជសាស្ត្រនៅគ្រប់ពេទ្យដែលជាដៃគូរបស់ ប.ស.ស បន្ថែមពីលើមន្ទីរពេទ្យរដ្ឋ។ បុគ្គលស្វ័យនិយោជន៍ ជាស្ត្រីដែលបង់ភាគទានបាន ៩ ខែ ជាប់គ្នានឹងទទួលបានប្រាក់បំណាច់លម្ហែមាតុភាពនៅពេលសម្រាលកូន និងវិភាជន៍ប្រាក់បូជាសព នៅពេលទទួលមរណភាព។
លោក ហេង សួរ បានបញ្ជាក់ដែរថា កាលពីថ្ងៃទី២៤ ខែតុលា កន្លងទៅលោក ហ៊ុន ម៉ាណែតបានដាក់ឱ្យដំណើរការរបបថែទាំសុខភាពតាមមូលនិធិសមធម៌សុខាភិបាលជូនគ្រួសារងាយរងហានិភ័យ និងមានវិសាលភាពគ្របដណ្តប់ ប្រមាណ ៤៩ម៉ឺនគ្រួសារ ស្មើនឹងសមាជិកសរុបជាង ១,៨ លាននាក់ បន្ថែមទៀត ដែលនឹងធ្វើឱ្យផ្នែកថែទាំសុខភាព តាមរយៈមូលនិធិសមធម៌សុខាភិបាលនឹងគ្របដណ្តប់ដល់ប្រជា-ជនសរុបប្រមាណជាង ៤ លាននាក់។
លោកថ្លែងថា ៖ «ជារួមការដាក់ឱ្យអនុវត្តកម្មវិធីទាំង២នេះរួមបញ្ចូលគ្នានឹងពង្រីកសេវាថែទាំសុខភាពបានដល់ប្រជាជនចំនួនប្រមាណជាង ៩លាននាក់ ដែលដៃគូ និងមិត្តភក្តិជាច្រើនបានកោតសរសើរ និងអបអរសាទរចំពោះការឈានមុខរបស់កម្ពុជាក្នុងការឆ្ពោះទៅរកភាពគ្របដណ្តប់សុខភាពជាសកលនាពេលដ៏ខ្លីខាងមុខផងដែរ»។
សូមរំឭកដែរថា ក្រសួងការងារបានសហការជាមួយស្ថាប័ន និងដៃគូពាក់ព័ន្ធមួយចំនួនបានកំណត់ជ្រើសរើសវិស័យ និងមុខជំនាញអាទិភាពដោយធ្វើការសិក្សាលើស្ថានភាពសេដ្ឋកិច្ច តាមវិស័យ និងអនុវិស័យការសិក្សាទីផ្សារ ការងារផ្អែកលើចំនួនរោងចក្រ សហគ្រាស និងកម្មករនិយោជិតនិងគោលនយោបាយអាទិភាព ឬយុទ្ធសាស្ត្រនយោបាយនានាដោយកំណត់បានមុខជំនាញសម្រាប់ជំហានដំបូង ចំនួន ៣៨ មុខជំនាញ។
ក្នុងនោះវិស័យអាទិភាពមានចំនួន ១០ រួមមាន៖ សំណង់,អគ្គិសនី និងថាមពល, អេឡិចត្រូនិក,បរិក្ខារត្រជាក់ និងកម្ដៅ, កម្មន្តសាល, មេកានិកទូទៅ/មេកានិករថយន្ត, ទេសចរណ៍, សេវាកម្ម, កសិកម្ម និងកសិឧស្សាហកម្ម, ធុរកិច្ចនិងព័ត៌មានវិទ្យា៕
