លោកនាយករដ្ឋមន្ត្រី ហ៊ុន សែន នៅថ្ងៃចន្ទនេះបានអះអាងថា ទំនាក់ទំនងរវាងកម្ពុជា និងបារាំងមានកម្រិតលើសពីប្រទេស និងប្រទេស ឈានដល់កម្រិតបុគ្គល និងបុគ្គលប្រៀបដូចជាបងប្អូននឹងគ្នា។ ការអះអាងយ៉ាងដូច្នេះ គឺជាការឆ្លើយតបទៅការលើកឡើងរបស់ លោក សម រង្ស៊ី ដែលកាលពីចុងឆ្នាំមុន លោកបានបរិហារ្ត៍ថា លោក ហ៊ុន សែន ឆ្លៀតប្រើតួនាទីជាប្រធានអាស៊ានទៅសុំជួបប្រធានាធិបតីបារាំងនៅវិមានអេលិសហ្សេ។
នៅក្នុងពិធីចែកសញ្ញាបត្រដល់និស្សិតនៅព្រឹកថ្ងៃទី២០កុម្ភៈ លោកប្រមុខរដ្ឋាភិបាលកម្ពុជាបានជំរុញឲ្យប្រទេសបារាំងមុខមកបញ្ជាក់ពីលើអ្វីដែល លោក សម រង្ស៊ី កាលពីចុងឆ្នាំមុន បានបរិហារ្ត៍ថា លោក ហ៊ុន សែន ឆ្លៀតយកតួនាទីជាប្រធានអាស៊ានទៅសុំជួបប្រធានាធិបតីបារាំងនៅវិមានអេលិហ្សេ។
សម្រាប់លោក ហ៊ុន សែន គឺលោកបានមិនសុំទៅសុំជួបប្រធានាធិបតីបារាំងនោះឡើយ ខណៈលោកអះអាងថាទំនាក់ទំនងរវាងកម្ពុជា និងបារាំងពេលនេះ បានឈានដល់កម្រិតបុគ្គល និងបុគ្គល ប្រៀបដូចជាបងប្អូនដោយលោកចាត់ទុកលោក អេម៉ានុយអែល ម៉ាក្រុង គឺជាប្អូនធម៌។
ការអះអាងថាយ៉ាងដូច្នេះដោយលោក ហ៊ុន សែន គូសបញ្ជាក់ថា លោកមានលេខទំនាក់ទំនងផ្ទាល់ជាមួយលោកអេម៉ានូអែល ម៉ាក្រុង ចំនួន៣ប្រព័ន្ធ គឺតាមតេឡេក្រាម WhatsApp និងSignal ។
បើតាមលោកប្រមុខរដ្ឋាភិបាលកម្ពុជា លោកតែងតែមានទំនាក់ទំនងជាមួយលោក អេម៉ានូអែលជាញឹកញាប់ទាំងក្នុងក្របខណ្ឌប្រទេស និងប្រទេស ពិសេសទំនាក់ទំនងរវាងបុគ្គលនិងបុគ្គលថែមទៀតផង ដោយភាគីទាំងពីរសន្យាថា ហៅគ្នាត្រឹមតែជាឈ្មោះ សែន និងអេម៉ានូអែល ប៉ុណ្ណោះ។ លោក ហ៊ុន សែន អះអាងថាលោកតែងតែផ្ញើសារទៅលោកអេម៉ានូអែល ជាភាសាអង់គ្លេស និងជួនកាលមានសហការីរបស់លោកជួយសរសេរជាភាសាបារាំង។ លោកថា ជាការឆ្លើយតប លោកអេម៉ានុយអែល បានសរសេរជាភាសាខ្មែរមកវិញតាមរយៈអ្នកធ្វើការនៅវិមានអេលិហ្សេជាជនជាតិខ្មែរ។ នេះគឺជាអ្វីដែល លោក ហ៊ុន សែន អះអាងថា លោកមានទំនាក់ទំនងដល់កម្រិតបុគ្គលក្នុងភាពជាបងប្អូនជាមួយប្រធានាធិបតីបារាំង ពោលលោកពុំបានប្រើតួនាទីជាប្រធានអាស៊ានទៅសុំជួបលោកអេម៉ានុយអែល ម៉ាក្រុងនោះឡើយ។
ការដែលលោក ហ៊ុន សែន ចេញមុខមកបកស្រាយបែបនេះ ដោយសារតែអ្នកគាំទ្រលោក សម រង្ស៊ី មួយចំនួនបានរិះគន់ថា លោក ហ៊ុន សែន មិនត្រូវបានប្រទេសអ្នកមាន ឬប្រទេសសេរីទទួលស្វាគមន៍នោះទេ ទើបលោកសម្រេចចិត្តទៅទស្សនកិច្ចជាលើកដំបូងនៅកោះម៉ាឌីវដែលមានប្រជាជនតែ៥៥ម៉ឺននាក់។
ទោះជាយ៉ាងណា លោក ហ៊ុន សែន អះអាងថា ជាទម្លាប់របស់លោកមិនដែលទៅសុំជួបប្រទេសអ្នកមាននោះឡើយ តែលោកជ្រើសរើសអទិភាពប្រទេសអ្នកក្រដើម្បីជួប តួយ៉ាង ទីម័រខាងកើត និងបង់ក្លាដែស។ ចំណែកជំនួបជាមួយអធិកាបតីអាល្លឺម៉ង់ និងនាយករដ្ឋមន្ត្រី ហ្វាងឡង់ លោក ហ៊ុន សែន អះអាងថាមេដឹកនាំប្រទេសទាំងនេះជាអ្នកសុំជួបលោកមុនទាំងអស់៕
